MƏHDUD FİZİKİ İMKANLILAR ÜÇÜN

NAXÇIVAN REGİONAL İNFORMASİYA MƏRKƏZİ

Birləşmiş Millətlər Təşkilatının qərarı ilə aprel ayı “Dünya autizm maarifləndirmə ayı” kimi qeyd edilir.

Naxçıvan Muxtar Respublikası Ali Məclisi Sədrinin 2016-cı il 11 yanvar tarixli Sərəncamı ilə təsdiq edilən “2016-2020-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı”nın icrası ilə bağlı Naxçıvan Muxtar Respublikası Əmək və Əhalinin Sosial Müdafiəsi Nazirliyinin təşkilatçılığı ilə Məhdud Fiziki İmkanlılar üçün Naxçıvan Regional İnformasiya Mərkəzində aprelin 11-də autizm maarifləndirmə ayı ilə bağlı bu qəbildən olan uşaqların valideynləri ilə maarifləndirici görüş keçirilib.

Tədbirdə Naxçıvan Müəllimlər İnstitutunun rektoru, professor Oruc Həsənli, mərkəzin müəllim-psixoloqu Minurə Əliyeva, Məhdud Fiziki İmkanlılar üçün Naxçıvan Regional İnformasiya Mərkəzinin müəllim-defektoloqu Çinarə Abbasova autizm xəstəliyi olan uşaqların ailə üzvləri ilə psixoloji-mənəvi söhbət aparıblar. Autizm sindromlu uşaqlarla psixoloji işin, təlim-məşğələlərinin aparılması, “Autizm” kitabının mahiyyəti haqqında və valideynlərin autizmli uşaqlarla ünsiyyəti barədə tövsiyələr verilib.

Bildirilib ki, autizm sindromlu uşaqlar ana nəvazişinə daha çox ehtiyac duyurlar. Valideyn autizmli uşaqla ünsiyyətdə səbirli olmalı və ona sevgi ilə yanaşmalı, uşağa bacarığının inkişaf etdirməsində köməklik göstərməlidir. Bütün bunlar sağlamlıq imkanları məhdud uşaqların sosial reabilitasiyasına əhəmiyyətli dərəcədə təsir göstərir.

Sonda valideynləri maraqlandıran suallar cavablandırılıb.